Ministri serb i Punëve të Jashtme, Ivica Daçiq, ka thënë se me përfaqësuesit e bashkësisë ndërkombëtare kurrë nuk ka pasur bisedime se çfarë dëshiron Serbia si rezultatin përfundimtar në negociatat me Kosovën.

“Nuk kemi ardhur te këto tema. Sa herë që është hapur një mundësi për të shkuar drejt  kompromisit, gjithmonë ka ndodhur ndonjë incident. Këto nuk janë vetëm dyshime, ekzistojnë pretendime se disa vende evropiane nuk duan që kjo të përfundojë shpejt”, ka thënë Daçiq për gazëtën “Politika”

Ai tha se Britania e Madhe dhe Gjermania nuk e përkrahin ndarjen e Kosovës.

“Këtu po zhvillohet një betejë gjeopolitike, por jo më me Moskën, por midis partnerëve perëndimorë. Bëhet fjalë për një gjeografi politike shumëfishtë, që ndërthuret me ne”, tha Daçiq, përcjell Telegrafi.

Ndërsa, lidhur me mundësinë e arritjes së një marrëveshjeje përfundimtare deri në fund të këtij viti, Daçiq tha se “kjo do t’i takonte fantastikës shkencore politike”.

Ai thekson se duhet të hiqet taksa ndaj mallrave serbe në mënyrë që të vazhdojnë dialogun, “por fakti se ata [Kosova] nxori Platformën për dialog, kjo na vë në një pozicion të ri politik – se ata nuk duan asnjë kompromis”.

Kreu i diplomacisë serbe tha se Platforma e Kosovës për dialog nuki intereson fare.

Daçiq përkujton dy pozicione krejtësisht të kundërta, mes palës serbe dhe kosovare në bisedime. “Njëra është se Kosova është një autonomi në kuadër të Serbisë, dhe  tjetra është se Kosova është një shtet i pavarur brenda kufijve të saj, ‘të cilët ata i paraqesin si ndërshtetërore’,  të cilat në fakt janë kufij mes krahinës dhe Serbisë qendrore”, tha Daçiq.

“Vështirë është të arrihet deri të kompromisi, mbi bazën e këtyre dy pozicioneve. Pse amerikanët  kanë lëvizur nga pozicioni i tyre? Sepse  e kuptuan se Serbia kurrë nuk do ta njohë Kosovën e pavarur,  pa ndonjë kompromis. Dhe, cili është kompromisi? A kurrë nuk kanë thënë se kjo është zgjidhja më e mirë. Ata vetëm thonë, të shohim se cilat janë propozimet”, ka thënë Daçiq.